உலகம் யாவையும்

நவம்பர் 07, 2012

பொதுஜனத்தின் மீது எனக்குப் புகார் இல்லை

ஆதி பெருந்தேவன்

அன்புள்ள பொதுஜனத்திற்கு ஒரு வழிப்போக்கன் எழுதிக்கொள்ளும் மனம் திறந்த மடல்.

மறக்க முடியுமா?

பாலு மகேந்திராவின் "மூன்றாம் பிறை" ஞாபகத்திற்கு வருகிறது. பழைய நினைவுகள் எல்லாவற்றையும் மறந்துபோன ஸ்ரீதேவிக்கு கமலஹாசன் ஒரு கதைப்பாட்டு பாடிக் காண்பிப்பார்: நீல நரியின் கதை.. நரியும் வெளியே வந்தது...மழையில் கொஞ்சம் நனைந்தது...நீலச் சாயம் வெளுத்துப் போச்சு டும் டும் டும் டும்..ராஜா வேஷம் கலைஞ்சு போச்சு டும் டும் டும் டும்....டும் டும் டும் டும்..

இப்போதெல்லாம் நரியின் சாயம் கலைய வாய்ப்பில்லை. நரிகள் குடை பிடிக்கக் கற்றுக்கொண்டன. நிதின் கத்காரியைக் கேளுங்கள், நிச்சயம் சொல்வார். அவர் ஒரு குடைத் தொழிற்சாலையே வைத்திருக்கக்கூடும். ஆம் என்றொரு அசரீரி கேட்கிறது அத்வானியின் குரலில். சும்மாங்காட்டியும் என்று ஒரு குரல் வருகிறது...அது சுஷ்மா சுவராஜினுடையது.

அரசியல் வியாபாரிகள்

அரசியல் செய்யவந்தவர்கள் வியாபாரம் செய்ததும் வியாபாரம் செய்ய வந்தவர்கள் அரசியல் செய்ததும் நம் நாட்டில் நடந்த கதைகள்தான். வியாபாரியே அரசியல்வாதியாகவும் அரசியல்வாதியே வியாபாரியாகவும் இருப்பது நவீன நாகரீகம்!

ஊழல் செய்கிற அரசியல் தலைவர்களுக்குள் ஒற்றுமை இருக்கிறது. எந்தக் கட்சியாக இருந்தால் என்ன? ஊழலில் எல்லோரும் ஒற்றுமையைக் கட்டிக் காக்கிறார்களாம்! கட்சி பேதங்கள் இல்லாமல் நடக்கின்றன களவு பேரங்கள். நம் நாட்டின் முதல் மருமகன் வதேரா நில விவகாரம் பற்றி நிதின் கட்காரியைக் கேட்கிறார்கள்..."உண்மைதான்..பத்திரங்கள் பற்றி நான் அறிவேன். ஆனால் இவை சாட்சியங்கள் ஆகிற சாத்தியங்கள் இல்லை" என்று அமைதியாகப் பதில் சொல்கிறார்.

நீயும் ஊழல் நானும் ஊழல்; நாட்டைப் பற்றி நமக்கென்ன கவலை?

கட்சி வேறு வேறு; ஆனால் காட்சி ஒன்றாகத்தான் இருக்கிறது! மராட்டிய மண்ணில் நீர்ப்பாசன ஊழலும் லவாசா ஊழலும் பிரபலமானவை. நாட்டின் வேளாண்துறை மந்திரியின் உறவினர் அஜித் பவார் இருக்கிற போதுதான் இவை இரண்டுமே நடந்தன! நீர்ப்பாசன ஊழலில் பி ஜே பி இன் கைவரிசை. லவாசாவில் சரத் பவாரின் குடும்ப கைவரிசை. கொடுக்கல் வாங்கல் விட்டுக் கொடுத்தல்...சகலமும் நடக்கும். வார்த்தைகள் ஊமைகள் ஆகின்றன; மௌனம் மரணித்துப் போகிறது. சரத் பவாருக்கும் நிதின் கட்காரிக்கும் மறைமுக புரிதல்கள்....சந்தேகமே வேண்டாம். இனி ஜனநாயகத்துக்கு சாவே கிடையாது. மறுபடி மறுபடி சாக முடியாதல்லவா?

ஒய்யாரமாய்த் தாழம்பூ கொண்டையாம்... உள்ளே இருப்பது ஈரும் பேனுமாம்

ஒரு ஊழலைக் கண்டுபிடிப்பதும் விலாவாரியாக விவரிப்பதும் அவ்வளவு சுலபமில்லை. உள் கட்சிக்குள் நடக்கும் உள் குத்துகளால்தான் அந்தரங்க அசிங்கங்கள் அரங்கேறுகின்றன...மோடியை முன்னுக்குக் கொண்டுவரத்தான் கட்காரிக்குக் கல்தா!

அப்படியே வரலாற்றைக் கொஞ்சம் வாசித்துப் பார்த்தல் அதிர்ச்சியாக இருக்கும். கோட்சே போட்ட குட்டிக் காரணங்களும் ஆர் எஸ் எஸ் போட்ட ஆட்டங்களும், ஜனசங்கத்தின் சாகசங்கள், உமா பாரதியின் ஊடல்கள், பங்காரு லட்சுமணனின் பரிசோதனை முயற்சிகள், மோடியின் குஜராத் கொலைவெறி தாண்டவம், அத்வானியின் ரத்த யாத்திரை, வாஜ்பாயின் "ரொம்ப ரொம்ப நல்லவரு" நாடகம், இப்படி இந்தியாவின் இட்லர்தனங்கள்...ஏராளம், ஏராளம்.

ஆனால் இவர்களைத்தான் அவதார புருஷர்களாகச் சித்தரிக்கின்றன "உள்ளொன்று வைத்துப் புறம் ஒன்று பேசும்" ஊடகங்கள்...

இரண்டு கட்சிகளுமே எகிறி எகிறி வாதாடுகின்றன: இது வியாபாரம் சம்பந்தப்பட்டதே ஒழிய ஊழல் என்று எப்படிச் சொல்வது? இரண்டு கட்சிகளைச் சேர்ந்த (வதேரா மற்றும் கத்காரி) நபர்களைப் பற்றி மட்டுமல்ல, இவர்கள் மீது புகார்கள் சுமத்தும் கேஜ்ரிவால் குழுவினரின் ( இமாச்சலப் பிரதேச அரசின் கருணையில் தேயிலை எஸ்டேட் வாங்கிய சாந்தி பூஷன், விவசாய நிலத்தை வியாபாரமாக்கிய அஞ்சலி தமானியா) செய்கைகளும் சட்ட விரோதாமாகச் செய்யவில்லை என்று சாதிப்பதுதான்...

திரு திருவென்று விழிக்கும் திருவாளர் பொதுஜெனமே

இவர்கள் செய்கிற திருகு ஆட்டங்களில், தில்லு முள்ளு செய்கைகளில் பேந்த பேந்த முழிக்கிற பொதுஜெனமே... என்ன செய்யப் போகிறாய்? "ஒண்ணுமே புரியலை ஒலகத்துலே" ன்னு ஒப்பாரி வைக்கப் போறியா? எந்த கட்சி ஜெயிக்குமோ அந்தக் கட்சிக்கு ஒட்டு போடுற உன்னுடைய பரிதாப நிலைமையைப் பாத்தியா?

லத்தீன் அமெரிக்காவில் சாவேஸ் எப்படி வர முடியுது?

கியூபாவில் எப்படி காஸ்ட்ரோ வர முடியுது?

சாராயம் வாங்கிக் கொடுத்து பிரியாணி போட்டவன் ஆட்சிக்கு வந்தால் அவஸ்தைப் படுவது யாரு?

ஊழலே செய்யாத கட்சிகள் இந்தியாவில் இல்லவே இல்லையா??

கண்டுபிடிக்கிறதுல உனக்கு என்ன கஷ்டம்?

பொதுஜெனமே! நீயும் எல்லாமே மறந்துபோன ஸ்ரீதேவியா?

கடைசி வரையிலும் உன்னால் கமலஹாசனை அடையாளம் கண்டுபிடிக்க முடியாதா?

விரக்தியில் இருக்கிறேன் நான். நம்பிக்கை தர வேண்டியது நீயல்லவா?

மூன்றாம் பிறை எப்போது பௌர்ணமி ஆகும்?

இப்படிக்கு,

உன்னுடனே வாழ்ந்து உன்னுடனே சாக விரும்பும் ஒரு பைத்தியம்.

7 attachments — Download all attachments View all images Share all images