பிடல் காஸ்ட்ரோவைப் பின்தொடரும் குரல்
••••••••••••••••••••••••••••••••••••••••••••••••••••••••••••••
ஒரு சதுரங்கத்தின் சாயுங்காலம்
ராஜா ராணி
யானை குதிரை
சிப்பாய்
ஒட்டுமொத்தமாக வெட்டப்படுகிற வேளையில்…
அசரீரியாய் ஒலிக்கிறோம்
ஆட்ட நாயக அகங்கார ஓங்காரங்கள்.
நாளை வேறு விளையாட்டாகலாம்
அன்றிப் புதிய சதுரங்கம் புகுத்தப்படலாம்
ஆடுபொருள்களே மாற்றப்படலாம்
சிலர் விளையாடத் தகுதியற்றவர் என்று
விதிகள் வரலாம்
எதுவும் சாத்தியம்…எங்கள் விளையாட்டை
யாரறிவார்?

கணிக்கமுடியாத நிதியின் காட்டாற்று நடனத்தில்
எக்காளமிடும் எங்கள் கடவுளின்முன் நிகழ்த்தப்படும்
எந்திர தந்திர காலகால கணினி பூஜைகள்

மானுடம்…மானுடம்…மானுடம்…
யாருக்கு வேண்டும் உங்கள்
திரிபுகளைச் சுமந்தலையும்
தேய்ந்த ரிகார்ட் வாசகங்கள்?

ஒவ்வொரு வார்த்தையிலும்
எங்கள் ஊத்தை மெருகேறிய
பற்களின் எனாமல்கள்.

பொழுதுபோக்குப் பொம்மலாட்டங்களில்
மரணக்கயிறுகளில் தொங்கும்
மரப்பாச்சி பொம்மைகள்

மேடையில் நிகழ்த்தப்படும்
மரியாதைக்குரிய ஓநாய்களின் கண்ணீர் நெசவுகளைக்
கண்டடையும் நுட்பம் கைவரப்போவதில்லை
திரைமறைவில்
அகிம்சைக்கூடங்கள் என்னும் புனைபெயரில் அலையும்
ஆட்டுமந்தைகளின் பலிபீடங்கள்

பாட்டாளி சர்வாதிகாரம்
வார்த்தைகளை மட்டும் பத்திரப் படுத்திக்கொள்ளுங்கள்
இனி முற்றும் முழுசுமாய்….எங்கள்
மூளைகளின் சர்வாதிகாரம்.
ஜனநாயகப்போர்வைகளால் மூடப்பெறும்
சடலங்களின் நாற்றத்திற்கெனவே
பிரத்தியேகமாய் நறுமண ஆலைகள்

கம்யூனிசக் காளைகளின் சர்வதேசியத்தைக்
காயடிக்க
ஒவ்வொருத்தன் கையிலும்
உலகமயக்குறடு
புரட்சி கீதமிசைக்கும் உங்கள்
புல்லாங்குழல்கள் புசிக்கவே
காட்டில் உலவும்
கடும்பசியெடுத்த கானக்குயில்கள்

மனிதர்களை வசியம்செய்யும்
எங்கள் பைடு பைப்பர்களின் பின்
உங்கள் நடன மயக்க எலிமந்தைகள்

ஜனநாயகம்
பிருஷ்டங்களால் நகர்ந்து செல்லும்
பிரும்மாண்ட கேலி ஜந்து என்பதைப்
புரிந்து கொள்ளவோ புரியவைக்கவோமாட்டாத
புத்திஜீவிகளே
உங்களுக்குத் தெரியாமலே
உங்கள் லாயக் குதிரைகளின் கால்களில்
செக்குமாட்டுக் குளம்புகள்


குரலெடுத்துப் பாடுங்கள்
கூவுங்கள்
கோஷித்துக் கொக்கரித்துக் கொள்ளுங்கள்
காற்றில் நிகழும் கவிதைகளின்
கரப்புணர்ச்சிகளால்
பூமியில் தோன்றப்போவதில்லை
புரட்சி சிசுக்கள்

பீனிக்ஸாய் இருக்கலாம் உங்கள் பிடல்
நீரோக்களால் ஆன தேசங்களுக்கெனவே
நவீனமாய்த் தயாரிக்கப்பட்டிருக்கும்
புனைபெயர்களாலான நவ நவப்பிடில்கள்

பீனிக்ஸாய் இருக்கலாம் உங்கள் பிடல்
வானம் முழுவதும்
அலைந்து திரியுமெங்கள்
அரூப ராட்சச வாள்கள்

பீனிக்ஸாய் இருக்கலாம் உங்கள் பிடல்
இனி உருவாகவே முடியாது
நிகழ்கால மார்க்ஸ், மாவோ
நிகழ்கால லெனின், கிராம்ஸி
எங்களிடமோ
தத்துவத்தைக்கூட தனிநபராக்கும்
தத்வமஸி

பீனிக்ஸாய் இருக்கலாம் உங்கள் பிடல்
அறுநூற்று முப்பத்தெட்டு முறை தோற்றிருக்கலாம்
அறுநூற்று முப்பத்தொன்பது என்கிற எண்ணை
நீங்கள் அறிய மாட்டீர்கள்
நாங்கள் அறிவோம்….வோம்…வோம்…


கருத்துகள்

கருத்துரையிடுக

இந்த வலைப்பதிவில் உள்ள பிரபலமான இடுகைகள்

என் நண்பனின் அப்பாவும் சாய்வு நாற்காலியும்

"அறையில் மங்கலான வெளிச்சத்துல என் நண்பனின் அப்பா சாய்வு நாற்காலியில் படுத்துக்கிட்டிருந்தார். பக்கத்துல நண்பனின் அம்மா. தூண் ஓரமா நண்பனும் நானும் நின்னுக்கிட்டிருந்தோம். பின்னால் வங்கி மேலாளர். " எத்தனை வருசமானாலும் இன்னும் என் மனசுக்குள் ஆழமாப் பதிஞ்சிருக்கிற ஒரு காட்சி. அன்றைக்கு தொலைக்காட்சியில ஒரு நிகழ்ச்சியைப் பாத்துக்கிட்டிருக்கரப்போகூட திடீர்னு அந்தக்காட்சி மீண்டும் தோன்றி மறைந்தது. அன்றைய தொலைக்காட்சியில் ஒரு நிகழ்ச்சி... கலர் கலராக் காட்சிகள் திரையில் விரிந்தன...பெரீய்ய... மைதானம் ...வரிசை வரிசையாக் காருங்களா நின்னுக்கிட்டிருந்திச்சுங்க. எல்லாக் காருலயும் கொழந்தக் குட்டிங்களோட பெரியவுங்க குடும்பம் நடத்திக்கிட்டிருந்தாங்க. டிவிப்பெட்டியில இதக்காட்டி அமெரிக்காவுல வீட்டுக்கடனைத் திருப்பிக்கட்ட முடியாதவங்களை வீட்டைவிட்டே தொரத்திட்டாங்கலாம். அவங்கதான் கார் வீடுகள்-ல தங்கிக்கிட்டிருக்காங்கலாம். அங்கு இருந்த ஒவ்வொரு காருக்குள்ளும் என் நண்பனின் அப்பா சாய்வு நாற்காலியில் படுத்துகிட்டிருக்கிற மாதிரி தோணுச்சி. எம்மாம்பெரிய்ய அமெரிக்காவுல இப்பிடிகிகூட நடக்குமா? ஆச்சிரி...
மேலும் படிக்கவும்
கொசுக்களின் குருதியிலிருந்து  கடிதங்களுக்கு மை தயாரித்துக் கொள்கிறவர்   மானுடத்தின் தலைவாசல்  தாய்மடி  பச்சைமண்ணை ஏந்திக்கொள்ளும்  உள்ளங்கை  கருவறை  நாற்றங்கால்  கடவுள் வணங்கும் சந்நிதானம்  இத்தனை பெயர்களிலும்  இன்னும் புனையாத சில புனைபெயர்களிலும்  உலவும் ஆன்மா ... கவிதை! கவிதை கேட்கும் செவிகள் வாய்க்க  காலாற நடக்க வேண்டும்  பாதங்கள் தெருமண்ணைப் புசிக்க வேண்டும்  கண்களுக்கு--- பசியைப் பார்க்கும் பார்வை வேண்டும்  வள்ளுவனுக்குள் வசிக்க வேண்டும்  கம்பனுக்குள் கனிய வேண்டும்  இளங்கோவின் இதயம் வேண்டும்  பாரதியின் பதியம் வேண்டும்  கவிதை கேட்கும் செவிகள் வாய்க்க  காலாற நடக்க வேண்டும்  இதற்கெல்லாம்  புழுங்கும் பூமியில் ஏதொரு புல்வெளி? குப்பைமேடுகளில்  கரப்பான் பூச்சிகளாய் வாழும் வரத்தைக்  கடவுளா கொடுத்தான்...? இழந்த சொர்க்கம் பற்றி  எவரும் நினைப்பதில்லை  சாக்கடைக்குள் ப...
மேலும் படிக்கவும்
கடிதம் கொள்கலன் எண் 610 உலகிலேயே மிக வலிமைவாய்ந்த குற்றவாளி வாரன் ஆண்டர்சனுக்கு, இருபத்தைந்து ஆண்டுகளுக்கு முந்தைய ஒரு டிசம்பர் இரவில் உயிரிழப்புக்கும், தலைமுறை ஊனத்திற்கும் உயிர்ச்சிதைவு நோய்களுக்கும் ஆளான போபால் நகரத்திலிருந்து கையாலாகாதவன் எழுதிக்கொள்ளும் கடிதம். ஞாபகம் இருக்கலாம். அமெரிக்க அரசின் காங்கிரசு, கார் தயாரிக்கும் டொயாட்டா நிறுவன்த்தின் உயர்மட்ட நிர்வாகிகளையும், நிறுவன முதலாளியையும் குற்றம் சாற்றிய கதை. விவரம் இதுதான்…இரு சக்கர வாகனங்களில் குறைபாடு இருந்ததாம். அதனால் அமெரிக்க மக்களுக்கு உயிர்ச்சேதம் ஏற்பட்டால்…. அதற்காகத்தான் டொயாட்டா முதலாளியையும், அலுவலர்களையும் காங்சிரசில் வைத்து சரமாரியாக விசாரித்து வைதார்கள். அமெரிக்கர்களின் தேசப்பற்றுக்கு ஒரு அளவே இல்லையா ஆண்டர்சன்? இதுவும் ஞாபகம் இருக்கலாம். இருபத்தைண்டாண்டுகளுக்குப் பிறகு 2010 சூன் 7 ஆம் நாள் வெளியான போபால் நச்சுவாயுவைவிட ஆபத்து மிகுந்ததும் ஆச்சரியத்தைக் கொடுத்ததும் உயிரை உலுக்குவதுமான தீர்ப்பு. தன்னையும் மீறிய தருண்ம் ஒன்றில் சட்ட அமைச்சர் வீரப்ப மொய்லி, இது தாமதமான, புறக்கணி...
மேலும் படிக்கவும்