ஆறடி நிலம்
இயற்கை
தொட்டு எழுதிய தூரிகையில்
இத்தனைக் குருதியா?

கரையில்
உரசி உரசி உள்ளிழுத்துக்கொண்டது
நுரைத் துகிலா?
சவத் துணியா?

கரையில் ஒதுங்கிய சிப்பிகளைப் போல்
இறைந்து கிடந்தன மனித உடல்கள்...

இயற்கை குடிகாரனின்
மதுக்கோப்பையில் வழிந்த
மரண திரவமாய் சுனாமி...

விறைத்துப் போன பிணங்களின் இதயத்தில்
உறைந்துபோன கனவுகளை
அடையாளம் காணத்தான்
பீறிட்டு எழுந்ததோ எரிமலைக் குழம்பு?

இயற்கையின் பருவநிலைப் பிழையினும்
என்னால் சகிக்க முடியாதது
மனிதனின் சுயநல மொழி!

குட்டிப் பையனையும் குண்டுப் பையனையும்
இன்னும் இறக்கி விடவில்லை
ஹிரோஷிமா!
அதற்குள் ... பூகோள வெடிப்பாய் புகுஷிமா...

வெடித்த அணுவுலையின்
அடிவாரத்தில் அலறிய
சகோதரனின் குரல்
ஓசோனில் எதிரொலிக்கும்

கதிர் வீச்சிலிருந்து
கருணை கசியுமா எனக்
கடவுளிடம் பிரார்த்தனை செய்பவர்கள்
படிக்கட்டும் நிராதரவான இக் கவிதையை

பிணங்களின் மேலிருந்து
கவிதை எழுதுவதை விடவும்
பெரிய சோகம் வேறு என்ன இருந்துவிடப் போகிறது?

கையால் ஆகாதவனின்
கருணை மனுவே இக் கவிதை!

வெடித்துச் சிதறிய அணுவுலையில் இருந்து
எடுக்கப்பட்டவைதான்
இக் கவிதையின் வார்த்தைகள்!

இன்னும் எத்தனை ஹிபாகுஷ்கள்* வேண்டும்
இந்த ஏகாதிபத்தியச் சக்ரவர்த்திகளுக்கு?

மனிதனின் தலைகளில்
இறைவனின் பெயரை எழுதி வைத்தவர்களே
இனி ஒவ்வொரு மண்டையோட்டிலும்
காண முடியும்
அணுவுலை வியாபாரிகளின்
பேராசைப் பெருவெடிப்பு...

மனித குலப் பரப்பு முழுவதும்
அவர்களின் வணிக வளாகம்...

இயற்கையின் பருவநிலைப் பிழையினும்
என்னால் சகிக்க முடியாதது
மனிதனின் சுயநல மொழி!

பிரபஞ்சம் அவர்களுடையதெனத்
தொங்கும் பெயர்ப் பலகை!

"பாதுகாக்கப்பட்டக் குடிநீரில்" இருக்கும்
பன்னாட்டு அரசியல்
தனியாரின்
"பாதுகாப்பான அணுவுலையிலும்"

காற்றில், தண்ணீரில், காய்கறியில்,
கருவில், ஆன்மாவில் எனக்
கதிர் வீச்சு கலக்காத இடமில்லை

கதிர்வீச்சுப் பிணங்களைக்
கண்டெடுப்போம்...

கல்லறைக்குள்ளும் கதிர்வீச்சு நிகழ இருக்கும்
சடலங்களைச் சேகரிப்போம்

அவ்வளவு மோசமில்லை
அணுவுலை வியாபாரிகளின்
அதீத கருணை

அவர்களின் பொருளாதாரச் சிறப்பு மண்டலத்தில்
நிச்சயம் கிட்டும்
அணுக்கதிர் பிணங்களை
அடக்கம் செய்ய ஆறடி நிலம்.


--நா.வே. அருள்


* ஹிபாகுஷ்கள் - ஹிரோஷிமா, நாகசாகியில் கதிர்வீச்சுப் பாதிப்பிற்கு
உள்ளாகி வாழ்ந்து வருபவர்கள்.

கருத்துகள்

கருத்துரையிடுக

இந்த வலைப்பதிவில் உள்ள பிரபலமான இடுகைகள்

என் நண்பனின் அப்பாவும் சாய்வு நாற்காலியும்

"அறையில் மங்கலான வெளிச்சத்துல என் நண்பனின் அப்பா சாய்வு நாற்காலியில் படுத்துக்கிட்டிருந்தார். பக்கத்துல நண்பனின் அம்மா. தூண் ஓரமா நண்பனும் நானும் நின்னுக்கிட்டிருந்தோம். பின்னால் வங்கி மேலாளர். " எத்தனை வருசமானாலும் இன்னும் என் மனசுக்குள் ஆழமாப் பதிஞ்சிருக்கிற ஒரு காட்சி. அன்றைக்கு தொலைக்காட்சியில ஒரு நிகழ்ச்சியைப் பாத்துக்கிட்டிருக்கரப்போகூட திடீர்னு அந்தக்காட்சி மீண்டும் தோன்றி மறைந்தது. அன்றைய தொலைக்காட்சியில் ஒரு நிகழ்ச்சி... கலர் கலராக் காட்சிகள் திரையில் விரிந்தன...பெரீய்ய... மைதானம் ...வரிசை வரிசையாக் காருங்களா நின்னுக்கிட்டிருந்திச்சுங்க. எல்லாக் காருலயும் கொழந்தக் குட்டிங்களோட பெரியவுங்க குடும்பம் நடத்திக்கிட்டிருந்தாங்க. டிவிப்பெட்டியில இதக்காட்டி அமெரிக்காவுல வீட்டுக்கடனைத் திருப்பிக்கட்ட முடியாதவங்களை வீட்டைவிட்டே தொரத்திட்டாங்கலாம். அவங்கதான் கார் வீடுகள்-ல தங்கிக்கிட்டிருக்காங்கலாம். அங்கு இருந்த ஒவ்வொரு காருக்குள்ளும் என் நண்பனின் அப்பா சாய்வு நாற்காலியில் படுத்துகிட்டிருக்கிற மாதிரி தோணுச்சி. எம்மாம்பெரிய்ய அமெரிக்காவுல இப்பிடிகிகூட நடக்குமா? ஆச்சிரி...
மேலும் படிக்கவும்
கொசுக்களின் குருதியிலிருந்து  கடிதங்களுக்கு மை தயாரித்துக் கொள்கிறவர்   மானுடத்தின் தலைவாசல்  தாய்மடி  பச்சைமண்ணை ஏந்திக்கொள்ளும்  உள்ளங்கை  கருவறை  நாற்றங்கால்  கடவுள் வணங்கும் சந்நிதானம்  இத்தனை பெயர்களிலும்  இன்னும் புனையாத சில புனைபெயர்களிலும்  உலவும் ஆன்மா ... கவிதை! கவிதை கேட்கும் செவிகள் வாய்க்க  காலாற நடக்க வேண்டும்  பாதங்கள் தெருமண்ணைப் புசிக்க வேண்டும்  கண்களுக்கு--- பசியைப் பார்க்கும் பார்வை வேண்டும்  வள்ளுவனுக்குள் வசிக்க வேண்டும்  கம்பனுக்குள் கனிய வேண்டும்  இளங்கோவின் இதயம் வேண்டும்  பாரதியின் பதியம் வேண்டும்  கவிதை கேட்கும் செவிகள் வாய்க்க  காலாற நடக்க வேண்டும்  இதற்கெல்லாம்  புழுங்கும் பூமியில் ஏதொரு புல்வெளி? குப்பைமேடுகளில்  கரப்பான் பூச்சிகளாய் வாழும் வரத்தைக்  கடவுளா கொடுத்தான்...? இழந்த சொர்க்கம் பற்றி  எவரும் நினைப்பதில்லை  சாக்கடைக்குள் ப...
மேலும் படிக்கவும்
கடிதம் கொள்கலன் எண் 610 உலகிலேயே மிக வலிமைவாய்ந்த குற்றவாளி வாரன் ஆண்டர்சனுக்கு, இருபத்தைந்து ஆண்டுகளுக்கு முந்தைய ஒரு டிசம்பர் இரவில் உயிரிழப்புக்கும், தலைமுறை ஊனத்திற்கும் உயிர்ச்சிதைவு நோய்களுக்கும் ஆளான போபால் நகரத்திலிருந்து கையாலாகாதவன் எழுதிக்கொள்ளும் கடிதம். ஞாபகம் இருக்கலாம். அமெரிக்க அரசின் காங்கிரசு, கார் தயாரிக்கும் டொயாட்டா நிறுவன்த்தின் உயர்மட்ட நிர்வாகிகளையும், நிறுவன முதலாளியையும் குற்றம் சாற்றிய கதை. விவரம் இதுதான்…இரு சக்கர வாகனங்களில் குறைபாடு இருந்ததாம். அதனால் அமெரிக்க மக்களுக்கு உயிர்ச்சேதம் ஏற்பட்டால்…. அதற்காகத்தான் டொயாட்டா முதலாளியையும், அலுவலர்களையும் காங்சிரசில் வைத்து சரமாரியாக விசாரித்து வைதார்கள். அமெரிக்கர்களின் தேசப்பற்றுக்கு ஒரு அளவே இல்லையா ஆண்டர்சன்? இதுவும் ஞாபகம் இருக்கலாம். இருபத்தைண்டாண்டுகளுக்குப் பிறகு 2010 சூன் 7 ஆம் நாள் வெளியான போபால் நச்சுவாயுவைவிட ஆபத்து மிகுந்ததும் ஆச்சரியத்தைக் கொடுத்ததும் உயிரை உலுக்குவதுமான தீர்ப்பு. தன்னையும் மீறிய தருண்ம் ஒன்றில் சட்ட அமைச்சர் வீரப்ப மொய்லி, இது தாமதமான, புறக்கணி...
மேலும் படிக்கவும்