அறிவிக்கப் படாதொரு
அவசர நிலைகாலம்
அடிபொய்யை வடிகட்ட
அரசாங்க ஜமுக்காளம்

தெரிவிக்கப் படாதொரு
தேசத்தின் போர்க்காலம்
தெருவதிர நடந்தாலே
திருவடிக்குச் சிறைக்காலம்

கனவு கண்டாலே
கைது நடவடிக்கை
கார்ப்பரேட் கட்டளைக்குச்
சுடுகாட்டு உடன்படிக்கை

உணவில் உப்பிருக்கா?
உளவுத்துறை தடுக்கும்
உறக்கத்தில் குறட்டைகளா?
ராணுவமே வந்தடக்கும்

இம்மென்றால் வனவாசம்
ஏனென்றால் சிறைவாசம்
சர்க்கார் அடிமைகளாய்ச்
சாகும்வரை உபவாசம்

கம்மென்று இருப்போமா?
கண்மூடிக் கிடப்போமா?
கவிதையிலே சொறிந்துவிட்டுக்
கால்நீட்டிப் படுப்போமா?

மோடி போட்டிருக்கும்
முகமூடி எத்தனையோ?
முகமூடிக் குள்வடிக்கும்
முதலைக்கடல் எத்தனையோ?
நாடு முழுவதிலும்
நாகங்கள் எத்தனையோ?
நாகத்துக் குள்ளிருக்கும்
நஞ்சுவகை எத்தனையோ?

பாரத் மாதா கி ஜே
சொல்லிச் சொல்லி மக்களுக்குப்
பாடை கட்டுகிற
பாசாங்கு எத்தனையோ?

வீரத் தமிழ்நாட்டில்
வேட்டைகளும் எத்தனையோ?
வேட்டைகளுக் குள்ளிருக்கும்
வெடிவிபத்து எத்தனையோ?

மூலைக்கு மூலை
மூலதனம் எத்தனையோ?
மூலதனம் செய்யுகிற
மூர்க்கத்தனம் எத்தனையோ?

ஆலைக்குச் சேவைசெய்ய
அரசுகளும் எத்தனையோ?
அரசுகளின் தூத்துக்குடி
அடக்குமுறை எத்தனையோ?

மந்திரிகள் கழுத்துகளில்
மாலைகளும் எத்தனையோ?
மக்களுக்குக் காத்திருக்கும்
மரணங்களும் எத்தனையோ?

தந்திரங்கள் எத்தனையோ?
தகிடுதத்தம் எத்தனையோ?
தமிழ்நாட்டு வரைபடத்தில்
தாக்குதல்கள் எத்தனையோ?

வெவசாயி முதுகெலும்பில்
வெதவெதமா தூக்குமரம்
வெவசாயி குடல் உருவி
வண்ண வண்ணக் கயிறு வரும்

வெதநெல்லு வாக்கரிசி
ஏருகாலு பாடைக்கழி
முப்பாட்டன் தோண்டிவச்ச
ஒற கெணறு பொதகுழியா?

பசியால பாடை செய்ஞ்சி
படுக்க வைக்கும் மோடிராசா
ஆதாரு எங்களுக்கு
நீவச்ச நெத்திக்காசா?

தெசையே தெரியாமத்
தெகைக்குறோண்டா மகராசா
வடக்கை வாழவச்சி
தெற்கு பூரா சுடுகாடா?

புட்டத்துல ஒட்டிவச்சோம்
பூமியாள நாற்காலி
பொதகுழியும் புடுங்குறாங்ஒன்
கார்ப்பரேட்டு சேக்காளி

சட்டத்துல ஓட்டையிட்டு
சமத்துவத்தப் பூட்டிப்புட்ட
இட்லருக்கு அண்ணாவே
இந்தியாவத் தின்னாயே

மக்கள் கூட்டத்தை
மதயானை ஆக்கிப்புட்டு
அங்குசத்க் கைப்பத்தி
அரசாள எண்ணுறயே

சுக்கல் சுக்கலாகத்
தேசத்தைத் துண்டாட
சூழ்ச்சி வலை  பின்னுறயே
சொதந்திரத்தத் தின்னுறயே

நாடு உருப்படுமா?
நந்தவனம் சீர்ப்படுமா?
நாட்டையே வெலபேசும்
நாக்குக்கு நோய் வருமா?

கூடு கலைக்கவரும்
குரங்கெல்லாம் ஓடிடுமா?
கூடும் மக்கள் குரல்
கொந்தளிப்பா மாறிடுமா?

* * *
ஜல்லிக்கட்டுக் காளைகளே
சாக்கடையா உன்னுலகம்?
ஜாதிமத சர்க்காரின்
சடலங்களா மண்ணுலகம்?

கொள்ளிக்கட்டை கொண்டுவந்தா
கோட்டைகூட சாம்பலாகும்
தூரமில்ல தூரமில்ல
தொட நெனச்சா பொன்னுலகம்.

கருத்துகள்

கருத்துரையிடுக

இந்த வலைப்பதிவில் உள்ள பிரபலமான இடுகைகள்

கொசுக்களின் குருதியிலிருந்து  கடிதங்களுக்கு மை தயாரித்துக் கொள்கிறவர்   மானுடத்தின் தலைவாசல்  தாய்மடி  பச்சைமண்ணை ஏந்திக்கொள்ளும்  உள்ளங்கை  கருவறை  நாற்றங்கால்  கடவுள் வணங்கும் சந்நிதானம்  இத்தனை பெயர்களிலும்  இன்னும் புனையாத சில புனைபெயர்களிலும்  உலவும் ஆன்மா ... கவிதை! கவிதை கேட்கும் செவிகள் வாய்க்க  காலாற நடக்க வேண்டும்  பாதங்கள் தெருமண்ணைப் புசிக்க வேண்டும்  கண்களுக்கு--- பசியைப் பார்க்கும் பார்வை வேண்டும்  வள்ளுவனுக்குள் வசிக்க வேண்டும்  கம்பனுக்குள் கனிய வேண்டும்  இளங்கோவின் இதயம் வேண்டும்  பாரதியின் பதியம் வேண்டும்  கவிதை கேட்கும் செவிகள் வாய்க்க  காலாற நடக்க வேண்டும்  இதற்கெல்லாம்  புழுங்கும் பூமியில் ஏதொரு புல்வெளி? குப்பைமேடுகளில்  கரப்பான் பூச்சிகளாய் வாழும் வரத்தைக்  கடவுளா கொடுத்தான்...? இழந்த சொர்க்கம் பற்றி  எவரும் நினைப்பதில்லை  சாக்கடைக்குள் ப...
மேலும் படிக்கவும்

என் நண்பனின் அப்பாவும் சாய்வு நாற்காலியும்

"அறையில் மங்கலான வெளிச்சத்துல என் நண்பனின் அப்பா சாய்வு நாற்காலியில் படுத்துக்கிட்டிருந்தார். பக்கத்துல நண்பனின் அம்மா. தூண் ஓரமா நண்பனும் நானும் நின்னுக்கிட்டிருந்தோம். பின்னால் வங்கி மேலாளர். " எத்தனை வருசமானாலும் இன்னும் என் மனசுக்குள் ஆழமாப் பதிஞ்சிருக்கிற ஒரு காட்சி. அன்றைக்கு தொலைக்காட்சியில ஒரு நிகழ்ச்சியைப் பாத்துக்கிட்டிருக்கரப்போகூட திடீர்னு அந்தக்காட்சி மீண்டும் தோன்றி மறைந்தது. அன்றைய தொலைக்காட்சியில் ஒரு நிகழ்ச்சி... கலர் கலராக் காட்சிகள் திரையில் விரிந்தன...பெரீய்ய... மைதானம் ...வரிசை வரிசையாக் காருங்களா நின்னுக்கிட்டிருந்திச்சுங்க. எல்லாக் காருலயும் கொழந்தக் குட்டிங்களோட பெரியவுங்க குடும்பம் நடத்திக்கிட்டிருந்தாங்க. டிவிப்பெட்டியில இதக்காட்டி அமெரிக்காவுல வீட்டுக்கடனைத் திருப்பிக்கட்ட முடியாதவங்களை வீட்டைவிட்டே தொரத்திட்டாங்கலாம். அவங்கதான் கார் வீடுகள்-ல தங்கிக்கிட்டிருக்காங்கலாம். அங்கு இருந்த ஒவ்வொரு காருக்குள்ளும் என் நண்பனின் அப்பா சாய்வு நாற்காலியில் படுத்துகிட்டிருக்கிற மாதிரி தோணுச்சி. எம்மாம்பெரிய்ய அமெரிக்காவுல இப்பிடிகிகூட நடக்குமா? ஆச்சிரி...
மேலும் படிக்கவும்
படம்
  கவிதை அலசல் / நா.வே.அருள் ************************************** எங்கள் பொங்கல் உப்புக் கரித்திருந்தது கவிதை . சோலை மாயவன் ~~~~~~~~~~~~~~~~~~~~~~~~~~~~~~~~~~~~~ உழவனின் பொங்கல் ஏன் உப்புக் கரிக்கிறது? மாடுகளுக்கும் மனிதர்களுக்கும் அதிக வித்தியாமில்லை.  மாடுகளுக்குக் கொட்டகைகள்.    மனிதர்களுக்கு வீடுகள்.    மாடுகள் முளைக்குச்சியில் கட்டப்பட்டிருக்கும்.  மனிதர்கள் உறவுக் குச்சியில் கட்டப்படாமலேயே சுற்றிச் சுற்றி வருகிறார்கள்.   மாடுகள்  தீனியை அசை போடுகின்றன.  மனிதர்கள் பசியை அசைபோடுகிறார்கள்.   மாடுகளுக்கு    மனிதர்கள் தண்ணீர் காட்டுகிறார்கள்.   மனிதர்களுக்கு வாழ்க்கை தண்ணீர் காட்டுகிறது.  மாடுகளின் கழுத்துகளில் நுகத்தடிகளின்  வடு.   மனிதர்களின் கைகளில் காய்ப்பு காய்த்த தடம்.  மாடுகளுக்குக் கொம்புகள் இருக்கின்றன.   மனிதர்களுக்கு அதுவுமில்லை. உழவன் விதைநெல்லைப் போல வற்றிப் போய் இருக்கிறான்.  அவனுக்கு உழவு மாடுகள்தான் உண்மையான உறவு.  வயலோடுதான் வாழ்க்கை.  பயிர் பச்சிலோடுதான் பாசம...
மேலும் படிக்கவும்